Leo Lionniren maisutasunak ez dauka su artifizialen beharrik irakurleari jakinarazteko kameleoiaren emozioak egilearenak direla eta animaliatxoaren ziurtasun ezak ere partekatuak direla. Kolore baten jabe obrak transmititzen digu izakien bizitzaren ezaugarri diren bakartasun-zentzua eta, aldi berean, kidetasunarena eta ziklikotasunarena.
Bere identitatearen bila dabilen kameleoi baten abentura kontatzen digu, eta azkenean nola ohartzen den garrantzitsuena ez dela kolorez aldatzeari uztea, baizik eta kolorea beste norbaitekin partekatzea.
Irudi xume eta funtsezkoak ditu, zeinetan kolorea eta gardentasunak gailentzen diren. Haiekin batera, testu neurtu-neurtu ere bai, aldi berean xaloa eta sakona den album honetan. Istorio honek, egilearen beste guztiek bezala animalia xumeak dituena protagonistatzat, askotariko irakurketa-maila ditu, eta, narrazioaren eraikuntza bikainari esker, gure irakurleak izango dira liburuari galdezka etorriko zaizkionak.
